شبه جزيرة -2

جاني ولدي هالمره يسألني عن عدد جزر قطر.. كم جزيرة؟؟.. وعديت له من اللي أتذكر كم جزيره.. حالول وشراعوه والاسحاط والعاليه والسافليه .. قال لي ماشاء الله كل هذيلا جزر قطر؟؟..كنت أحسبهم شويه!.. قلت له ودك تروح جزيرة قريبه ؟؟.. خلاص باوديك السافلية .. قال لي هذي أكبر أمنية!.. ودي نصيد سمك وقباقب ونتسلى تسليه ؟؟.... بس تذكرت إن الجزيرة محميه!!.. والصيد فيها ممنوع والغرامة فوق الألف والميه!!.. والجزر كلها طلعت بعد محمية!!.. مسموح لك بس تقعد على سيفها وياويلك لو تقدمت داخلها شويه!! .. لا تصيد قبقب ولا خثاق ولا هامور أو شعريه .. خلك واقف مكانك أو منسدح تتلفت وتتأمل بحرّية!.. بس هذا المسموح!.. وماعندك غير هالصلاحية!! .. قلت يا ولدي انت سمعت عن الحياة الفطرية!.. قالي إيه يعني الحياة الطبيعية!.. قلت زين عيل إذا تبي تحافظ على الحياة الفطرية لازم نبتعد عن الجزر والأماكن المحمية !.. وإذا تبي تحافظ على الثروة السمكية لا تحدق إلا بتصريح من البلدية!.. وأوعدك يا ولدي في إجازتي السنوية .. باوديك جزر المالديف فيها الراحة والحرية .. نصيد سمك و قباقب وناكلها مشويه .. والبحر ولله الحمد يشكل 71 في الميه من مساحة الكرة الأرضيه !!.

حلمــــــــــــان