التطور السلبي!

في يوم طلعت مع جاري  نتمشى في مجمع تجاري .. تجولنا وتمشينا وجلسنا وتعشينا .. رحنا للكوفي نشرب شاي ونتفرج على الرايح والجاي بنات وشباب مؤدبين كل واحد في حاله وشكلهم طيبين! .. قلت للجار ما تلاحظ إن شبابنا اليوم تغيرو ما قاموا يغازلون مثل أول؟ يمكن إنهم تحضرو وإلا اعقلو؟!.. ضحك في وجهي  وقال : يا غشيم يا صاحب الفكر القديم .. قول إن شبابنا اليوم تطورو ومع تكنولوجيا الاتصالات تقدمو!!..اليوم التكنولوجيا العصرية خلتهم ميه ميه .. وكل أعمال المغازلجيه صارت تدار بسرية!!.. قلت له اشلون فهمني ؟!..وعن سوالفهم علمني!.. قال شفت ذيك البنيه !!.. اللي جالسه في الأماكن العائلية وذاك الشاب اللي جالس أبعد منها بشويه ؟.. قلت له إيه ذيك اللي تضحك وهي تطالع الجوال!.. قال إيه .. عطني إذنك شوي تعال .. هذي ترى تضحك مع ذاك الشاب متواصله معاه بالبلوتوث أو المسنجر عن طريق البلاك بيري!!.. لا من شاف ولا من دري !!.. قلت والله صار المغازل (سيفتي) وين أيام لملاحق وين أيام توم وجيري !!.. الواحد كان يوصل حده علشان يعطي رقمه حق وحده .. يكتبه لها في ورقه وعلى مركز الشرطة تسبقه!!.. ينفضح بين الناس ويعيش حياته محتاس .. اليوم صار المغازل مأمن .. الشاب عنده (خيارات) ويتفنن يروح لأقرب مجمع .. ويشوف البنات وين تتجمع .. يعرض رقمه في البلوتوث وينطر نقدة الخيط وينتع!!.. ياحسرتي على شبابنا ما تطوروا مثل العالم ولا تقدمو.. بلدان شبابها تصنع وتاكل مما تزرع .. وبعض شبابنا يبتكرون أساليب في الشر ويتفننون في أشياء ما تنفع!.

حلمــــــــــــان